《NANA～世上的另一個我》：導演，辛苦晒。

影評：《Nana～世上的另一個我》（Nana）

假如，世上真係有另一個我，一個從未睇過原作漫畫既我，或者，呢篇影評，我可以寫得再狠D。

可以讚得狠D：人靚、景靚、角色造型服裝靚、兩位主角演得出色，尤以中島美嘉特別入形入格（反觀宮崎葵演繹稍嫌過火）、演唱會情景夠氣氛、故事流暢睇得舒服、貼近日本生活夠時代感、世界觀夠少女夠夢幻完全中晒大小女人心理；亦可以彈得更狠：回憶場面過於累墜、角色間缺乏聯繫，成套戲得娜娜、奈奈同阿蓮3個做獨腳戲咁，難為其餘角色，連花瓶都稱唔上……
只因佢係漫畫改編，一切褒貶，都要打個折扣。

成就讚原作，敗就怪導演。拍改編電影，一向吃力不討好：又要滿足原作fans，又要顧及一般觀眾既感受，盡量自然貼近現實；講到故仔之餘，又要唔悶親睇過漫畫，知晒劇情既入場客。以上咁矛盾既要求，難得導演竟然都一一克服，無奈，換黎既代價，就係上1段所講既種種缺點。當然，就如前1段所講，正因為佢係改編電影，不得不原諒呢位進退兩難既導演。

何況，《Nana》續集陸續有黎，導演可以補鑊既機會，重有大把。