影評：《外出》（April Snow）
裴勇俊加孫藝珍，強勁明星效應，今次卻造成反效果。
唔係話兩位係《外出》做得唔好，只係兩位既明星風範，早已蓋過導演許秦豪既淡淡然故事，明明係清蒸豆腐，重要灑咁多鹽花，為乜先？
撇開鹽花，可能重好味。導演許秦豪擅長情感描寫，前作品《八月照相館》同埋《春逝》，對男女主角既情感刻劃，都相當細致，貼近現實生活，掀起觀眾共鳴。
《外出》亦秉承上兩套作品既優點：男女主角分別被佢既老公老婆背叛，雙雙偷情，重發生交通意外變成植物人。過程間，男女主角心境變化，繼而決定再以偷情報復，再由偷情衍生愛情。一切一切，完全由導演巧妙既鏡頭安排，帶領觀眾投入。男女主角對白唔多、表情唔多，動作都唔多。負責講故事既，其實只有導演既鏡頭。
冇辦法，既然連大廚許秦豪都決定用呢兩位大卡士，骾唔落既，都惟有將就一下，尤其係兩位大星，真係空有靚樣但投入感欠奉，面對1次又1次既愛恨交纏，都猶如不食人間煙火既世外高僧。
當然，我地都唔係高僧，就好似一班只係全心入戲院，食孫藝珍或勇樣豆腐既fans，為既，豈只一磚清蒸豆腐？
沒有留言:
發佈留言