《下妻物語》：我地，都係Lolita公主。

影評：《下妻物語》（Kamikaze Girls）

未睇過《下妻物語》，你同我都以為自己對日本瞭如指掌。Lolita娃娃裝？一早見識過！電單車暴走族？細細個卡通片成日睇！《Kill Bill》式殺戮卡通片？睇得重多過港產片！或者，我地都忘記去了解，Lolita蕾絲背後，係種種對石屎森林、現實生活既逃避；電單車沙塵滾滾下，係暴走族友情證據。原來，我地對日本，都係一知半解，正如，我地所理解日本，就只有東京、涉谷、下北澤；下妻，真係聽都未聽過。

深田恭子飾演既Lolita少女，同暴走族飛女土屋安娜之間既友情，係成齣戲既主線。背後既伏筆，係描寫外表奢華、內心腐敗Lolita公主，點樣由幻想中既法國洛可可時代走出黎，重返現實，面對自己生活既地方下妻，結識地道既朋友。

或者，某程度上我地都係Lolita公主。假如，閣下自問崇拜日本文化，平日著Undercover或A Bathing Ape；同恭子一樣，閒時會成個彈起，飄入忘我境界，係時候降落地面，問下自己：咁樣生活，究竟為乜。